Dysgu Allweddol

Drwy cam hwn o’r Deialog Ddigidol: Cymru rydym yn parhau i weld effeithiau o’r rhaglen sy’n chwarae rhan bwysig wrth ein helpu i ddatblygu ein dealltwriaeth gyffredinol o gyswllt gwleidyddol, addysg ddemocrataidd ac ymgysylltiad ieuenctid. 

Isod rydym wedi amlinellu'r gwersi allweddol.

Gall fod sawl rheswm dros hyn. Roedd dysgwyr a ofynnodd gwestiwn yn fwy tebygol o fod wedi cwblhau’r holl waith paratoi gyda’u hathrawon, lle gwnaethom annog pob dysgwr i lunio cwestiwn i’w ofyn yn y sesiwn. Gall hyn hefyd adlewyrchu effaith maint y grŵp (gweler isod), gan ei fod yn haws gofyn cwestiynau mewn grwpiau llai. 

Fodd bynnag, mae hefyd yn awgrymu bod dysgwyr yn fwy ymgysylltiedig mewn sesiynau lle mae ganddynt y cyfle i gymryd rhan weithredol, ac mae'n dangos effaith gadarnhaol ymgysylltiadau dan arweiniad dysgwyr lle mae dysgwyr yn gallu siarad am faterion sy'n bwysig iddynt.

Grwpiau bach sydd orau wrth annog cyfranogiad democrataidd:

Dangosodd grwpiau bach y newid cadarnhaol mwyaf mewn meysydd sy'n gysylltiedig â chyfranogiad democrataidd, gan awgrymu eu bod yn fwy tebygol o gymryd rhan mewn democratiaeth y tu hwnt i'r sesiynau. Roeddent yn fwy tebygol o lofnodi deisebau, gwybod sut i gofrestru i bleidleisio a phleidleisio, a bod â mwy o ddiddordeb mewn gwleidyddiaeth. Cynyddodd nifer y dysgwyr mewn grwpiau bach sydd â diddordeb mewn materion cymdeithasol a gwleidyddol 21 pwynt y cant o'i gymharu â chynnydd o 2 pwynt y cant ar gyfer grwpiau canolig eu maint a gostyngiad o 8 pwynt y cant ar gyfer grwpiau mawr.

Mae gan grwpiau mawr effaith lai ar draws y rhan fwyaf o ddangosyddion:

Er y gall grwpiau mawr gynyddu nifer y dysgwyr sy'n gallu cwrdd â'u gwleidydd a chlywed ganddo, ac arwain at y dysgwyr hynny'n gwella eu gwybodaeth a'u sgiliau gwleidyddol, gwelsom fod ymddiriedaeth a hyder y rhan fwyaf o ddysgwyr yn y grwpiau hyn wedi lleihau mewn gwirionedd ar ôl cymryd rhan, gyda nifer y dysgwyr yn nodi eu bod yn teimlo'n hyderus yn rhannu eu barn gyda gwleidyddion yn gostwng 7 pwynt y cant a'r niferoedd yn nodi bod gwleidyddion yn malio am yr hyn maen nhw'n ei feddwl yn gostwng 2 pwynt y cant.

Credwn fod hyn oherwydd llai o gyfleoedd i gyfranogwyr ymgysylltu a gofyn cwestiynau. Mae hyn yn tynnu sylw at gyfaddawd allweddol rhwng maint ac ansawdd yr effaith yn y sesiynau hyn.

Yn benodol, mae gwybodaeth a dealltwriaeth wleidyddol dysgwyr cynradd wedi gwella'n fawr gan Deialog Ddigidol: Cymru o'i gymharu â dysgwyr hŷn. Cododd canran y dysgwyr Blwyddyn 4 i 6 a gytunodd â'r datganiad "Rwy'n deall system wleidyddol Cymru" o 51% cyn y rhaglen i 76% ar ôl y rhaglen, newid o 25 pwynt y cant. 

I ddysgwyr Blwyddyn 7 i 11, roedd y cynnydd cadarnhaol yn llai, gyda newid o 14 pwynt y cant. Mae’r cynnydd cadarnhaol yn gostwng eto ar gyfer dysgwyr Blwyddyn 12 a 13, gan godi 7 pwynt y cant.

Roedd 43% o'r athrawon a gymerodd ran yn y rhaglen o ysgolion cynradd. Mae hyn yn dangos nid yn unig bod dysgwyr cynradd yn elwa o Ddeialog Ddigidol: Cymru, ond bod awydd gwirioneddol am y rhaglen ac addysg ddemocrataidd mewn ysgolion cynradd. 

Mewn ymateb i'r datganiad “Rwy'n hyderus wrth rannu barn gyda gwleidyddion” cynyddodd hyder dysgwyr a gymerodd ran mewn un sesiwn 9%, o'i gymharu â dysgwyr a gymerodd ran mewn tair sesiwn neu fwy lle cynyddodd eu hyder 14%.

Adlewyrchir y duedd hon pan fydd dysgwyr yn ymateb i'r datganiad “Rwy'n teimlo'n hyderus yn siarad am faterion sy'n bwysig i mi”. Gwelodd dysgwyr a gymerodd ran mewn un sesiwn gynnydd o 4% mewn hyder, o'i gymharu â dysgwyr a gymerodd ran mewn tair sesiwn neu fwy lle'r oedd yn 16%.

Ar gyfer y rhan fwyaf o ddangosyddion, mae'n ymddangos bod terfyn ar faint mwy y byddant yn gwella trwy gymryd rhan mewn Deialogau lluosog, gyda fawr o wahaniaeth rhwng y rhai sy'n ymddangos yn rhan o 2 neu 3+ sesiwn, ond mae dangosyddion hyder yn parhau i gynyddu gyda mwy o sesiynau. Mae'r amlygiad i wahanol wleidyddion, y profiad o lunio mwy o gwestiynau ac ateb cwestiynau lluosog gan wleidyddion yn amlwg yn gwella hyder y dysgwyr.